Қазақстанда тұрып-ақ оқуға болатын 
5 үздік шетелдік университет

Сонымен қатар барлық филиалда қазақ тілі мен Қазақстан тарихы міндетті пән ретінде оқытылады. 

1.Beijing Language and Culture University (BLCU)

Бұл ЖОО — Қытай Халық Республикасының Білім министрлігіне қарасты ұлттық деңгейдегі университет. Дүние жүзіндегі тіл және мәдениет бағытындағы жетекші оқу орындарының бірі. Университет 1962 жылы құрылған және 300 мыңнан аса шетелдік студентті даярлаған. Университет «кішігірім БҰҰ» деген атпен танымал, өйткені әлемнің 170-тен астам елінің студенттері білім алған. Ең қызығы — мемлекет басшысы Қасым-Жомарт Тоқаев 1983−84 жылдары осы оқу орнының Бейжіңдегі орталығында тағылымдамадан өтіп, қытай тілін меңгерген.

Аталған университеттің Қазақстандағы филиалы 2024 жылы 3 шілдеде Астанада ресми түрде ашылды. Филиал 2024 жылы алғашқы 100 студентті қабылдады.  

Оқу бағдарламалары
Бұл университетте қос дипломды бағдарлама бар. Студент 3 жыл Астанада (BLCU Kazakhstan), 1 жыл Қытайдағы BLCU-дың негізгі кампусында оқиды. Нәтижесінде түлекке екі оқу орнынан да диплом беріледі.

2024−2025 оқу жылы үшін филиалда ұсынылған мамандықтар: 

• ағылшын және қытай тілдері (педагогика);
• аударма іскерлігі (қытай тілі).

2025 жылы магистрлік бағдарламаларды іске қосу туралы келісімге қол қойылды.

Ал докторантура бағдарламаларын ашу бойынша жұмыстар жалғасуда. 

Филиал кампусында қытай тілін меңгеру деңгейін бағалайтын қытай тілінің халықаралық тестін өткізетін HSK орталығы жұмыс істейді.

Гранттар
2025−2026 оқу жылына 80 гранттық орын ұсынылып отыр (қос диплом бағдарламалары үшін). 

2. Woosong University Kazakhstan (WSUK)

Woosong University — Оңтүстік Кореядағы жетекші жоғары білім беру орталықтарының бірі. IT, бағдарламалау, жасанды интеллект және басқа да технологиялық бағыттар бойынша білікті мамандар даярлайтын әлемге танымал оқу орны. Оның Қазақстандағы алғашқы халықаралық филиалы 2025 жылы Түркістан қаласында жаңа оқу жылында ашылды. 

Бастапқыда оқу орны 400-ден аса студентті қабылдады.

Оқу бағдарламалары
Woosong University Kazakhstan негізінен IT және технология саласындағы мамандарды даярлауға бағытталған. Бұл төмендегідей бағыттарды қамтиды: 

• жасанды интеллект (AI); 
• бағдарламалық қамтамасыз ету (Software Engineering);
• компьютер ғылымы және Web дизайн;
• мультимедиа және цифрлық технологиялар.

Оқу бағдарламалары ағылшын тілінде өтеді. Студенттерге Оңтүстік Кореядағы негізгі Woosong University немесе оның серіктес жоғары оқу орындарында оқитын мүмкіндік беріледі. 

Гранттар
Түркістан облысының әкімдігі 100 мемлекеттік грант бөлді. Сондай-ақ Woosong өзінің де гранттарын ұсынды. 

3. Cardiff University

Cardiff University — Ұлыбританиядағы Уэльс мемлекетінде орналасқан беделді жоғары оқу орны және Russell Group тобына кіретін зерттеу университеті (әлемдік рейтингте беделді орында тұр). 

Cardiff University‑дің Астанадағы филиалы 2025 жылы 3 қыркүйекте жұмысын бастады. Бұл — Cardiff University‑дің әлемдегі алғашқы шетелдік кампусы және Орталық Азиядағы Russell Group университетінің алғашқы филиалы. 

Оқу бағдарламалары
Қазіргі уақытта кампус бакалавр деңгейіндегі бағдарламаларды ұсынады. Оқу ұзақтығы — 4 жыл. Сабақтар ағылшын тілінде өтеді. 
Басты оқу бағыттары

• компьютер ғылымы;
• бизнес менеджмент;
• азаматтық инженерия;
• геология және кен іздеу.

Әр бағдарлама негізгі оқу алдындағы Foundation Year‑мен (негізгі дайындық жылы) STEM немесе бизнес бағытында басталады. 

Оқу ерекшеліктері
Барлық курстар Cardiff University‑дің академиялық талаптарына сәйкес өткізіледі және оқытушылардың өзі сабақ береді. Студенттер ағылшын тілінде білім алады және халықаралық білім беру жүйесінің талаптарына сай оқиды.   Алдағы уақытта заманауи оқу ғимараттары мен студенттік үйлер салынады деп жоспарланған. Сонымен қатар студенттер басқа кампустарда қысқа мерзімді оқуы мүмкін. 

Шәкіртақылар мен гранттар
Университет қазақстандық студенттер үшін гранттар мен шәкіртақыларды ұсынады (оқу ақысын төмендету/жеке қолдау пакеттері). Бірқатар студентке 500‑ге дейінгі грант беріледі деген жоспары да бар.

4. De Montfort University

De Montfort University (DMU) — Ұлыбританияның Лестер қаласында орналасқан университет. Ол 1870 жылы құрылған, әлемдік деңгейде танымал оқу орны.

De Montfort University Kazakhstan (DMUK) — осы университеттің Алматыдағы ресми филиалы. Бұл филиал — британдық диплом беретін елдегі алғашқы толыққанды университеттің бірі.

Филиал 2021 жылы қыркүйекте ашылып, содан бері Алматыда жұмыс істеп келеді. DMUK алғашында 200‑ден астам студентті қабылдады. 

Оқу бағдарламалары
DMUK бакалаврда әртүрлі бағыттар бойынша білім береді:

• бизнес және менеджмент;
• қаржы және инвестиция;
• маркетинг және коммуникация;
• саясаттану және халықаралық қатынастар;
• графикалық дизайн және иллюстрация;
• компьютер ғылымы;
• киберқауіпсіздік;
• бизнес деректерін талдау;
• жасанды интеллект.

Барлық бағдарлама ағылшын тілінде өтеді. 11-сыныптан кейін foundation‑мен бірге 4 жыл білім алады. Ал 12-сыныптан кейін барса, 3 жыл оқиды. Түлектерге британдық DMU дипломы беріледі.

Оқу ерекшеліктері
DMUK‑тегі барлық курс британдық академиялық талаптарға сәйкес өткізіледі. Оқу жоспары мен оқытушылар Cardiff University‑дің бақылауында болады. Студенттерді көбінесе шетелдік профессорлар мен тәжірибелі мамандар оқытады. Қалааралық немесе халықаралық кампустарға бір жылға ауысып оқитын мүмкіндік берілген.

Стипендиялар және мүмкіндіктер
Академиялық, шығармашылық бойынша немесе спортта жетістігі бар студенттерге DMUK гранттар, шәкіртақылар және жеңілдіктер береді. Студенттерге тағылымдама және кәсіби тәжірибе алу мүмкіндігі қарастырылған, сонымен қатар басқа елдердегі кампустарда оқуға болады.

5. Marche Polytechnic University

Marche Polytechnic University — Италия Республикасының Анкона қаласында орналасқан мемлекеттік жоғары оқу орны. Бұл университет ауыл шаруашылығы, инженерия, экономика, биология және басқа да салалар бойынша білім береді және әлем деңгейіндегі рейтингтерге кіреді. 

2025 жылғы 16 шілдеде Талдықорған қаласында Ілияс Жансүгіров атындағы Жетісу университетінің базасында Marche политехникалық университетінің филиалы ашылды. Бұл шешім Қазақстан мен Италия арасындағы халықаралық білім беру ынтымақтастығын дамыту мақсатында қабылданды. 

Оқу бағдарламалары 
Бүгінде оқытылып жатқан бағдарлама — «Агрономия» (ауыл шаруашылығы ғылымдары мен технологиялары). Студенттер бұл бағдарламаны оқыған соң, қос диплом алады. Түлектерге Marche Polytechnic University дипломы мен Қазақстанның Жетісу университеті дипломын табыстайды.

Тағам инженериясы, туризм, экономика, цифрлық технологиялар сияқты сала бойынша бағдарламаларды ашу қарастырылып отыр.

Оқу ерекшеліктері
Оқу процесіне италиялық профессорлар қатысады. Олар өз салалары бойынша дәрістер мен практикалық сабақтар береді. 

Бұл филиал студенттерге еуропалық деңгейдегі білім алу мүмкіндігін береді және білім сапасын арттыруға бағытталған. 

Болашақта студенттерге академиялық ұтқырлық бойынша халықаралық тәжірибеге қатысу және зерттеулер жүргізу мүмкіндігі берілуі мүмкін. 

Гранттар
Жетісу университетіндегі Marche политехникалық университетінің филиалында жергілікті гранттар бар: биыл Жетісу облысының әкімдігі 14 студентке оқу ақысын бөлген. Сондай-ақ Италиядағы университеттің халықаралық гранттары да бар.

Елімізде ашылып жатқан шетелдік беделді университеттердің филиалдары қазақстандық студенттерге шетелге шықпай-ақ халықаралық деңгейдегі білім алуға мүмкіндік береді. Студенттер әлемде мойындалған, дәрежесі жоғары диплом алады. Сондай-ақ ағылшын немесе басқа шет тілдерінде оқып, заманауи білім мен тәжірибе жинақтайды. Оқу құны шетелге қарағанда қолжетімді болады. Сонымен қатар болашақта жастарға Қазақстанда да, халықаралық еңбек нарығында да жұмыс істеуге жол ашылады. 

Құндызай Әмірбекқызы