Data Art компаниясының бренд және өнім менеджері Айша Оразалимова: Стартаптан халықаралық нарыққа қалай шығуға болады?

— Айша, қай оқу орнында, қай сала бойынша білім алдыңыз? 

Менің кәсіби жолым Нархоз университетіндегі қаржы факультетінен басталды. Соңғы курстарда Австрияның Грац қаласындағы FH JOANNEUM университетіне Global Business мамандығына оқуға бардым. Сол жерде алғаш рет IT саласымен танысып, осы салаға қызықтым. Алматыға оралғаннан кейін мен ҚБТУ-дың Project Management мамандығына магистратура бағдарламасына түстім. Ал ІІ курста Лилль университетінің Master 2 Global E-Business бағдарламасына оқуға шақыру алдым. Бағдарлама IT мен маркетингті біріктіруінің арқасында бұл салада жұмыс істегім келетініне нақты көз жеткіздім.

— Өнім мен брендті дамыту саласына келуіңізге не түрткі болды және мамандық таңдағанда өзіңіз үшін ең маңызды фактор қандай болды?

Оқу бітірген соң, алғаш мансап жолымды Астанадағы қазақстандық стартаптан бастадым. Содан кейін жергілікті IT компанияларда жұмыс істеп, мол тәжірибе жинадым. Бұл қор маған халықаралық нарыққа сенімді түрде шығуға мүмкіндік берді. Қазіргі уақытта өзім жұмыс істеп жүрген компанияның бренді мен өнімін әзірлеймін.

— Өнім мен брендті дамыту ұғымдарын өз тәжірибеңіз арқылы қалай түсіндірер едіңіз? Бұл салаға енді қадам басып жатқан адам ең алдымен нені түсініп, неден бастауы керек деп ойлайсыз?

Менің ойымша, өнім дайындағанда, ең алдымен, құндылыққа ден қою керек. Біздің жасап жатқан дүниеміз халыққа не үшін керек екенін және қандай мәселені шеше алатынымызды жақсы білуіміз қажет. Брендпен жұмыс істеу дегеніміз адамдардың сенімін ақтау үшін жұмыс істеу. Сонымен қатар ұсынған өніміміз адам өмірінде қандай орын алатыны да өте маңызды.

— Бастапқы және орта деңгейдегі мамандарға пайдалы деп санайтын қандай құралдар, платформалар немесе қолданбалар бар? Ал өзіңіз күнделікті жұмыста қандай инструменттерді жиі қолданасыз?

— Зерттеу нәтижелері команда немесе бизнес күткен бағытқа сәйкес келмеген жағдай болды ма? Мұндай кезде өз позицияңызды қалай дәлелдейсіз және ортақ шешімге қалай келесіз?

Қателік адамды өсіреді. Қателескенде тұрған ештеңе жоқ деп ойлаймын. Перфекционизмнің кесірінен бәрі мінсіз болуы керек деп қате ойлаймыз. Бастысы, қадам басып, сынды қабылдай білу керек. Сонымен қатар әр істен қорытынды жасап, процесті жақсартуға тырысқан абзал.

— Сіздің ойыңызша, өнім мен брендті дамыту саласында «жақсы» маман мен «күшті» маманды ажырататын негізгі айырмашылық неде?

Жақсы маман тапсырмаларды уақытында орындаса да, ынтасы мықты болмауы мүмкін. Ал мықты маман жұмысқа нақты не керегін түсініп, өзіне жүктелген міндетті артығымен орындайды. Командада үлгі алатын адамдар болса, тіпті жақсы болады.

— Жұмыстан тыс уақытта немен айналысасыз? Хоббиіңіз жұмысыңызға немесе шығармашылық дамуыңызға әсер ете ме?

Хобби туралы айтар болсақ, мен күнімді қолдан келгенше қызық өткізуге тырысамын. Жұмыстан бөлек, өзімді дамытуға, дене бітімімді бір қалыпта ұстауға және рухани өсуіме ерекше көңіл бөлемін. Мысалы, мен теннис ойнағанды пен өнерді жақсы көремін. Бұлар мәдени көзқарасымды қалыптастыруға көмектеседі, жаңа идея келеді. Сондай-ақ өнер дәрістеріне қатысамын: ұлы суретшілердің шығармашылығымен танысып, оларға не шабыт сыйлағанын түсінемін.

— Өнім мен брендинг саласында жаңадан жұмыс бастаған жастарға қандай кеңес берер едіңіз? 

Ең бастысы — сенімді болу, ұмтылу, тәуекелге бару және жауапкершілікті алу. Өзіңізді қызықтыратын бағытта даму, бастамашылық таныту және дамуыңызға уақыт бөлу маңызды. Сонымен қатар, денсаулығыңыз, мансабыңыз және жеке өміріңіз сияқты барлық нәрсені теңестіруді ұмытпаңыз.

Сұхбаттасқан Құндызай Әмірбекқызы