Шетелге шықпай оқуға болатын 5 әлемдік университет

1. Heriot-Watt University

Heriot-Watt University — Шотландияның Эдинбург қаласында орналасқан халықаралық ғылыми-білім беру университеті. Сонымен қатар Ақтөбе, Дубай және Малайзияда кампустары бар. Бұл оқу орнының негізі 1821 жылы қаланған. Университетте әлем бойынша 30 000-нан астам студент білім алып жатыр. 
Heriot-Watt University мен Қ. Жұбанов атындағы Ақтөбе өңірлік университеті арасында стратегиялық серіктестік ресми түрде 2023 жылы басталды. Серіктестік мақсаты — Қазақстанның жоғары білім жүйесін халықаралық стандартқа сәйкестендіру және батыс өңірдегі білікті инженерлік кадрлар даярлау.

ЖОО-ға студенттер ақылы және мемлекеттік гранттар бойынша қабылданады, ал оқу ағылшын тілінде өтеді.  

• Оқу бағдарламалары:
• Электр энергетикасы;
• Компьютерлік инженерия;
• Мұнай инженериясы және энергоменеджмент.

Студенттер оқу бағдарламасын аяқтаған соң екі диплом алады. Сондай-ақ университеттің Go Global бағдарламасы аясында студенттер Эдинбург, Дубай немесе Малайзиядағы кампустарында бір семестр немесе одан да ұзақ уақыт оқи алады.  

Ақылы оқу үшін өтінішті 20 маусымнан 25 тамызға дейін, ал грантқа қатысуға 13−20 шілде аралығында қабылдайды.

2. Coventry University Kazakhstan

Coventry University Kazakhstan — Ұлыбританиядағы беделді Coventry University-дің Қазақстандағы ресми филиалы. Университет 2024 жылы Астана қаласында ашылды.

Coventry University-дің тарихы 1843 жылдан басталады. Университет тәжірибеге және еңбек нарығына бағытталған бағдарламаларымен танымал. Оқу сапасы Ұлыбританияның Teaching Excellence Framework (TEF) жүйесі бойынша Gold деңгейімен бағаланған.

Оқу орнында Foundation Year (дайындық жылы) бағдарламасы бар, яғни ағылшын тілі мен академиялық дағдыларды күшейтіп, бакалавриатқа дайындалуға болады. Сонымен қатар бұл ЖОО-да бакалавариат пен магистратура оқуға болады.

Coventry University-дің дайындық жылына 2026 жылдың 12 қаңтарынан бастап қабылдайды. «Бизнес» және «Компьютерлік ғылымдар» бағыттары бойынша бакалавриат бағдарламалары бар. Оқуды 2026 жылдың қаңтарында немесе 2026 жылдың қыркүйегінде бастауға болады. Бакалавриатқа қабылдау 2026 жылдың қыркүйек айынан басталса, магистратураға қаңтардан бастап қабылдайды. 

3. MGIMO University

MGIMO University (Мәскеу мемлекеттік халықаралық қатынастар институты) — дипломатия, халықаралық қатынастар және саясат саласындағы әлемге танымал, жетекші университеттердің бірі. Оқу орны 1944 жылы құрылған және Ресей Сыртқы істер министрлігінің негізгі кадрлық базасы саналады. MGIMO түлектері арасында дипломаттар, министрлер, халықаралық ұйымдар өкілдері, ірі саясаткерлер мен сарапшылар бар. Университет халықаралық рейтингтерде International Relations бағыты бойынша үздік жоғары оқу орындарының қатарынан тұрақты түрде көрініп келеді.

MGIMO University-дің Қазақстандағы филиалы Астана қаласында Л. Н. Гумилев атындағы Еуразия ұлттық университеті базасында ашылған. Бұл жоба Қазақстан мен Ресей арасындағы білім беру саласындағы стратегиялық әріптестік аясында жүзеге асырылды. 

Оқу бағдарламалары:

• Халықаралық қатынастар;
• Халықаралық құқық;
• Саясаттану;
• Аймақтану және әлемдік саясат.

Оқу бағдарламалары Мәскеудегі MGIMO стандарттары бойынша, жоғары академиялық талаппен жүргізіледі. Бұл оқу орнының басты ерекшелігі деп көптілді білім беретінін атаса болады. Студенттер негізгі пәндерді орыс тілінде, осымша 2−3 шет тілін (ағылшын, француз, қытай және т.б.) тереңдетіп оқиды.

Бағдарламаны аяқтаған түлектер MGIMO University дипломын алады. 

4. University of Arizona

University of Arizona — АҚШ-тағы жетекші зерттеу университеттерінің бірі. Оқу орны 1885 жылы құрылған және әлемге инженерия, IT, жаратылыстану ғылымдары мен зерттеу бағыттары бойынша белгілі. Университет QS World University Rankings рейтингінде тұрақты түрде алдыңғы 300 университеттің қатарында келеді.

University of Arizona-ның Қазақстандағы филиалы Солтүстік Қазақстан облысы, Петропавл қаласында, М. Қозыбаев атындағы Солтүстік Қазақстан университеті базасында ашылған. Бұл — Қазақстандағы алғашқы америкалық зерттеу университетінің филиалы.

Жоба Қазақстанның жоғары білімді интернационалдандыру және өңірлерде сапалы білімге қолжетімділікті арттыру саясаты аясында іске асырылды.

Оқу бағдарламалары:

• Компьютерлік ғылымдар және бағдарламалық инженерия;
• Ақпараттық жүйелер;
• Биотехнология;
• Білім беру психологиясы.

Филиалда білім толықтай ағылшын тілінде жүргізіледі. Бағдарламалар АҚШ-тағы University of Arizona стандарттары бойынша оқытылады.

Түлектер оқуын аяқтаған соң University of Arizona-ның америкалық дипломын алады. Бұл диплом АҚШ-та берілетін құжатпен тең және халықаралық еңбек нарығында мойындалады. Сонымен қатар студенттер АҚШ-тағы негізгі кампусқа академиялық мобильдік бағдарламалар арқылы барып оқу мүмкіндігіне ие.

5. Dong-Eui University

Dong-Eui University — Оңтүстік Кореяның Пусан қаласында орналасқан, қолданбалы білім мен индустриямен тығыз байланысқа басымдық беретін университет. Оқу орны 1977 жылы құрылған және бүгінгі таңда Кореядағы медицина, денсаулық сақтау, IT, дизайн және инженерия бағыттары бойынша танымал жоғары оқу орындарының бірі саналады. Университет Кореяның еңбек нарығына бейімделген, практикалық дағдыларды алдыңғы орынға қоятын білім беру моделін ұстанады.

Dong-Eui University-дің Қазақстандағы филиалы Қостанай қаласында ашылған. Бұл жоба Қазақстан мен Оңтүстік Корея арасындағы білім беру саласындағы стратегиялық әріптестік аясында жүзеге асырылып отыр. Филиалдың негізгі мақсаты — Қазақстанда отырып, корей білім стандарттары бойынша мамандар даярлау, сондай-ақ студенттерді Азия нарығына бағытталған кәсіби ортаға бейімдеу.

Оқу бағдарламалары:

• Ақпараттық технологиялар (IT);
• Инженерлік бағыттар;
• Денсаулық сақтау және биомедицина;
• Дизайн және қолданбалы өнер.

Оқу процесі ағылшын және корей тілдерінде жүргізіледі. Студенттер корей тілін меңгеру арқылы Корея компанияларында тағылымдамадан өтуіне, академиялық мобильдік бағдарламалармен Пусандағы негізгі кампуста оқуына, корей еңбек нарығына шығуына мүмкіндігі бар.
Түлектер оқуын аяқтаған соң Dong-Eui University дипломын алады. Бұл диплом Оңтүстік Кореяда және халықаралық деңгейде мойындалады.